BAKI,AzerVoice
İran İslam Respublikasının Yol və Şəhərsalma naziri Farzani Sadiq Türkmənistanda səfərdə olub və Arkadag şəhərində keçirilən "Sülh və etibar ili: uşaqların xeyrinə beynəlxalq əməkdaşlığın inkişafı" adlı beynəlxalq konfransda iştirak edib.
AzerVoice xəbər verir ki, Türkmənistana etdiyi səfər çərçivəsində bir neçə görüşlər keçirən İran naziri, iki ölkə arasında sınaq məqsədli sərnişin dəmir yolu əlaqələrinin qurulması və yük daşımalarının həcminin artırılması barədə razılığa gəldiklərini bildirib.
Nazir, öz ölkəsinə qayıtdıqdan sonra jurnalistlərə açıqlama verərək, sınaq məqsədli sərnişin dəmir yolu daşımalarının Maşat-Serahs (İran) və Mary (Türkmənistan) marşrutu üzrə həyata keçirilməsi və gələcəkdə bu marşrutun Özbəkistana qədər genişləndirilməsi təklif edildiyini qeyd edib.
Sərnişin dəmir yolu daşımalarının qurulması ilə paralel olaraq, dəmir yolu nəqliyyatı ilə yük daşımalarının həcmini 2 dəfə, yəni 200-dən 400 vaqona çatdırmaq barədə fikir mübadiləsi aparılıb.
İranın naziri Aşqabadda Türkmənistanın Xarici İşlər naziri və nəqliyyat sahəsinin nümayəndələri ilə görüşüb. Görüşlərdə təbii qazın ixracı, elektrik enerjisi təminatı, texniki və mühəndislik xidmətlərinin ixracı, Etrek-Gumdag avtomobil yolunun layihəsi barədə müzakirələr aparılıb.
Həmçinin tərəflər gələn 2 ay ərzində Tehranda iqtisadi əməkdaşlıq üzrə Türkmənistan-İran işçi qrupunun birgə iclasının keçirilməsi barədə razılığa gəldilər.
