BAKI, AzerVoice
TÜRKSAT 6A Türkiyəni 11 ölkə arasında seçilən peyk
istehsalçısına çevirib.
AzerVoice xəbər verir ki, Nəqliyyat və
İnfrastruktur naziri Abdulkadir Uraloğlu Türkiyənin ilk yerli və
milli rabitə peyki olan TÜRKSAT 6A-nın istifadəyə verilməsi ilə
ölkənin peyk istehsal edən 11 ölkə sırasına daxil olduğunu
açıqlayıb.
Nazir bildirib ki, peyk rabitə, mülki və hərbi əlaqələrdə 100 faiz
təhlükəsizlik təmin edəcək, televiziya yayım keyfiyyətini isə daha
yüksək səviyyəyə qaldıracaq.
Nazir qeyd edib ki, TÜRKSAT 6A-nın inkişafı üçün ilk addımlar 2006-cı ildə atılıb və sonrakı peyklərin istehsalında türk mühəndislərinin iştirakı əsas şərt kimi irəli sürülüb. Layihə çərçivəsində TÜBİTAK UZAY, ASELSAN, TUSAŞ və CTECH birlikdə çalışaraq 2018-ci ildən faktiki istehsala başlayıblar.
Peyk TUSAŞ-ın Kahramankazan rayonundakı Milli Kosmik Sistemləri Test və İnteqrasiya Mərkəzində istehsal olunub, 2024-cü ilin iyulunda SpaceX-in Cape Canaveral bazasından orbitə göndərilib və ilk sınaq yayımları fevralın 17-də həyata keçirilib.
Nazir bildirib ki, peykin nəzərdə tutulan xidmət müddəti 15 ildir, lakin əvvəlki TÜRKSAT peyklərinin daha uzun müddət işlədiyini nəzərə alaraq bu müddətin artacağı gözlənilir: “TÜRKSAT 3A artıq 17 ildir fəaliyyət göstərir və ehtimal ki, 20 ilə çatacaq”.
Qeyd edək ki, bu gün TÜRKSAT 6A-nın rəsmi istifadəyə verilməsi mərasimi keçirilir və bununla da peykin tam gücü ilə istifadəsi başlanacaq.
