BAKI, AzerVoice
Togg-un yeni sedan modeli T10F üçün ilkin sifarişlərin aprelin sonu və ya mayın əvvəlində açılması planlaşdırılır, ilk tədarüklər isə iyun və iyul aylarında həyata keçiriləcək.
AzerVoice xəbər verir ki, Türkiyənin
yerli elektrik avtomobili Togg, T10X SUV modelindən sonra sedan
modeli T10F-i təqdim etməyə hazırlaşır.
Daha sərfəli qiymətə satışa çıxarılması gözlənilən bu model, 600 km
məsafə qət edəcək və 213 at gücünə malik olacaq.
T10F modeli, 180 kVt/saata qədər sürətli doldurma imkanı ilə diqqət çəkir. Bu sistem sayəsində avtomobilin batareyası 28 dəqiqə ərzində 20 faizdən 80 faizə qədər dolacaq. Sürücülər üçün uzun məsafəli səyahətləri daha rahat etmək məqsədilə Trugo şarj stansiyalarında daha sürətli enerji yükləmə imkanı yaradılıb.
Togg T10F üçün satışdan əvvəl müxtəlif maliyyələşdirmə imkanlarının təqdim ediləcəyi gözlənilir. Hazırda fərdi istifadəçilər üçün 500 min TL-yə qədər 12 aylıq 0 faizli kredit təklif edildiyi halda, korporativ istifadəçilər üçün 1 milyon 500 min TL-yə qədər kommersiya maliyyə dəstəyi mövcuddur.
Qısa mənzilli V1 başlanğıc paketi üçün qiymətin 1,3 milyon - 1,4 milyon TL arasında dəyişəcəyi, uzun mənzilli modeldə isə qiymətin 1,6 milyon - 1,9 milyon TL aralığında olacağı gözlənilir. İlk mərhələdə satışa çıxarılacaq versiyaların əsasən V2 və uzun mənzilli modellər olacağı bildirilir.
