BAKI, AzerVoice
Xarici işlər naziri Hakan Fidan 3-4 aprel tarixlərində Brüsseldə keçiriləcək NATO Xarici İşlər Nazirləri Toplantısında iştirak edəcək.
AzerVoice xəbər verir ki, toplantı çərçivəsində kollektiv müdafiə, müttəfiqlər arasında yük bölgüsü, müdafiə sənayesi və Rusiya-Ukrayna müharibəsi kimi əsas məsələlər müzakirə olunacaq.
Dörd sessiyadan ibarət toplantının ilk iclası yalnız 32 müttəfiqin iştirakı ilə keçiriləcək və burada NATO-nun iyunda Haaqada baş tutacaq sammitinə hazırlıq məsələləri də nəzərdən keçiriləcək. İkinci sessiyada NATO-nun Asiya-Sakit okean tərəfdaşları ilə əməkdaşlığı müzakirə ediləcək.
Qeyd edək ki, üçüncü sessiya NATO-Ukrayna Şurası formatında baş tutacaq və Ukraynanın ehtiyacları, müharibənin gedişi və Avropa müttəfiqlərinin yardımı müzakirə olunacaq. Sonuncu sessiyada isə Avropa İttifaqının təhlükəsizlik və müdafiə sahəsindəki təşəbbüsləri dəyərləndiriləcək.
Nazir Fidanın toplantıda Türkiyənin Avro-Atlantik təhlükəsizliyinə verdiyi töhfələri vurğulaması, NATO-nun cənub-şərq cinahında Türkiyənin strateji mövqeyinin əhəmiyyətini qeyd etməsi və Aİ-nin müdafiə təşəbbüslərində Türkiyənin iştirakının vacibliyini bildirməsi gözlənilir.
