BAKI, AzerVoice
Qətər qazının Suriya və Türkiyə üzərindən Avropaya nəqli yenidən gündəmə gəlib.
AzerVoice xəbər verir ki, Dəməşq rəhbərliyi ilə
aparılan danışıqlar nəticəsində qazın Səudiyyə Ərəbistanı,
İordaniya, Suriya və Türkiyə vasitəsilə Avropaya çatdırılması
barədə prinsipial razılıq əldə olunub.
Layihənin mərkəzində Suriyanın Aralıq dənizi sahilində yerləşən və
Türkiyənin idarə edəcəyi Tartus limanı dayanır.
Diplomatik mənbələrə görə, Türkiyə Tartus limanı üzərindən qazın dənizdən quruya daşınmasını təmin edəcək. Layihənin reallaşması regional sülh və iqtisadi inkişaf baxımından strateji əhəmiyyət daşıyır. Bundan əlavə, Avropa Birliyi enerji təhlükəsizliyi baxımından bu marşrutu Rusiya qazına alternativ kimi qiymətləndirir.
Qeyd edək ki, Qətər qazının Avropaya boru kəməri ilə nəqli ideyası 2009-cu ildə irəli sürülsə də, o vaxtkı Suriya rəhbərliyi tərəfindən rədd edilmişdi. Lakin bölgədəki diplomatik dəyişikliklər və Türkiyənin təşəbbüsləri ilə layihə yenidən aktuallaşıb.
