Bakı, AzerVoice
Türkiyə Xarici İşlər Naziri Hakan Fidan, HƏMAS-ın Siyasi Bürosunun üzvü Halil Hayye ilə telefon danışığı aparıb.
AzerVoice xəbər verir ki, telefon danışığı zamanı Qəzza zolağında davam edən humanitar böhran, İsrailin bölgəyə hücumları və atəşkəs səyləri müzakirə edilib. Hakan Fidan, Türkiyənin bölgədə sülh və sabitliyin təmin olunması üçün diplomatik səylərini davam etdirdiyini vurğulayıb.
Danışıqlarda, həmçinin, humanitar yardımların Qəzzaya maneəsiz şəkildə çatdırılması və mülki əhalinin müdafiəsi məsələləri də gündəmdə olub. Fidan, Türkiyənin fələstinli mülki vətəndaşların qorunması və atəşkəsin təmin edilməsi üçün beynəlxalq səviyyədə fəal rol oynadığını bildirib.
HƏMAS rəsmisi Halil Hayye isə İsrailin hücumlarının fələstinli mülki vətəndaşlar üzərində yaratdığı fəlakətli təsirlərdən danışıb və beynəlxalq ictimaiyyəti Qəzzadakı vəziyyətə daha çox diqqət yetirməyə çağırıb.
Qeyd edək ki, Türkiyə, Qəzzadakı müharibənin dayandırılması və Fələstin xalqına humanitar dəstəyin artırılması üçün müxtəlif beynəlxalq platformalarda diplomatik fəaliyyətini davam etdirir.
