Türkiyədən SDQ-yə qəti xəbərdarlıq

Bakı, AzerVoice

Türkiyə Prezidenti Rəcəb Tayyib Ərdoğan Suriya Demokratik Qüvvələrini (SDQ) silahlarını təhvil vermədikləri təqdirdə ciddi şəkildə təhdid edib.

AzerVoice xəbər verir ki, Ərdoğan Ankarada Ədalət və İnkişaf Partiyasının (AKP) parlament qrup toplantısında çıxışı zamanı bəyan edib ki, ya separatçı qatillər silahlarını yerə qoyacaqlar, ya da silahları ilə birlikdə Suriya torpaqlarında basdırılacaqlar.

O, Türkiyənin məqsədinin bölgədə, xüsusilə Suriyada, sülh, firavanlıq və sabitliyi təmin etmək olduğunu vurğulayıb.

Bu arada, Suriyanın şimal-şərqindəki kürd siyasi qüvvələri və SDQ arasında baş verən qarşıdurmalar diqqət mərkəzindədir. Dəməşqdə Əhməd əl-Şaranın başçılıq etdiyi yeni administrasiya ixtilafların həlli və vahid nümayəndə heyətinin yaradılması məqsədilə məsləhətləşmələr aparır. Müxalif Kürd Milli Şurasının sözçüsü Feysəl Yusufun sözlərinə görə, SDQ lideri Mazlum Abdi ABŞ və Fransa səfirləri ilə görüşlər keçirib.

Eyni zamanda, Suriyada kürd nümayişləri ilə yanaşı, etnik və dini zəmində gərginliklər də artıb. Suriya İnsan Haqları Müşahidə Qrupu (SOHR) və şahidlərin məlumatına görə, Hələbdə Ələvi məbədinə hücumu əks etdirən videonun yayımlanmasından sonra Homs və digər bölgələrdə genişmiqyaslı etiraz aksiyaları keçirilib. Homsda Suriya hakimiyyət orqanları axşam saat 18-dən səhər saat 8-ə qədər komendant saatı tətbiq edib. SOHR-in məlumatına görə, xüsusilə sahilboyu və mərkəzi bölgələrdə ələvilərin çoxluq təşkil etdiyi ərazilərdə gərginlik yüksəkdir.