BAKI,AzerVoice
İtaliyanın Roma klubunun və Almaniya milli komandasının təcrübəli müdafiəçisi Mats Hummels mövsüm sonunda peşəkar futbol karyerasını başa vuracağını açıqlayıb.
AzerVoice xəbər verir ki, bu barədə 36 yaşlı futbolçu rəsmi X hesabında paylaşım edib.
"Hazırda hisslərimlə mübarizə aparıram. İndi isə hər bir futbolçunun üzləşdiyi o an gəlib çatıb. 18 ildən artıq davam edən karyeram və futbolun mənə bəxş etdiyi saysız-hesabsız şeylərdən sonra bu yay futboldan ayrılıram"- deyə paylaşımda qeyd olunub.
Karyerasına Bavariya akademiyasında başlayan Hummels, daha sonra keçdiyi Borussiya Dortmuntda sərgilədiyi performansla geniş tanınıb.
Təcrübəli müdafiəçi Almaniya Bundesliqasında 6 dəfə çempionluq yaşayıb ki, bunlardan ikisi Dortmundla olub. O, 2012-13 və 2023-24 mövsümlərində Dortmundun heyətində iki dəfə UEFA Çempionlar Liqasının finalında iştirak etsə də, titula sahib çıxa bilməyib.
Almaniya millisində 78 oyuna çıxan Hummels, 2014-cü ildə FIFA Dünya Kubokunu qazanan komandanın da üzvü olub.
