BAKI,AzerVoice
ABŞ prezidenti Donald Tramp TikTok-un satışına dair danışıqların son dərəcə yaxın olduğunu bildirib.
AzerVoicexəbər verir ki, əgər
Çin şirkəti ByteDance platformanı satmasa,
tətbiqin ABŞ-da qadağan ediləcəyi gözlənilir.
ABŞ Konqresi tərəfindən qəbul edilən qanuna əsasən,
TikTok-un Çin şirkəti ByteDance tərəfindən
satılması tələb edilir. Trampın müdaxiləsi ilə qadağa aprelin 5-nə
qədər təxirə salınıb, lakin bu tarixdən sonra platformanın
Apple və Google Play mağazalarından silinə
biləcəyi bildirilir.
Donald Tramp Air Force One-da jurnalistlərə bildirib ki, bir çox investor TikTok-un alınması üçün yarışır. Amazon Ağ Evə son dəqiqə təklifi etsə də, rəsmi açıqlama verməyib. Oracle həmtəsisçisi Larry Ellisonun və iş adamı Frank McCourt-un potensial alıcılar arasında olduğu bildirilir. Reddit-in həmtəsisçisi Alexis Ohanian və milyarder Kevin O’Leary də bu təkliflərə qoşulub.
İlon Mask isə TikTok almaq niyyətində olmadığını açıqlayıb. Eyni zamanda, dünyanın ən məşhur YouTuber-lərindən biri olan MrBeast (Cimmi Donaldson) bir qrup investorla birlikdə platformanı almaq istədiyini bildirib.
Microsoft, Blackstone, Andreessen Horowitz və Perplexity AI kimi texnologiya nəhəngləri də TikTok səhmlərinə maraq göstərir. Ağ Ev, ByteDance-ın TikTok alqoritmini saxlamaqla ABŞ üçün ayrıca bir şirkət yaratması variantını da nəzərdən keçirir.
Qeyd edək ki, TikTok ABŞ-da 170 milyon istifadəçiyə sahibdir və 2024-cü ildə gündəlik orta hesabla 51 dəqiqə istifadə edilib. Ekspertlər hesab edirlər ki, tətbiqin qadağan edilməsi Instagram Reels və YouTube Shorts kimi rəqiblərin bazar payını artıracaq. Amazon-un Twitch platforması və Çində yerləşən Xiaohongshu (RedNote) da alternativlər arasında göstərilir.
Tramp TikTok-un qadağasını lazım gələrsə, uzada biləcəyini deyib. Lakin ekspertlər hesab edirlər ki, bu məsələnin həlli üçün yaxın günlərdə konkret razılaşma əldə edilə bilər.
