BAKI, AzerVoice
SpaceX, "Fram2" missiyası çərçivəsində ilk dəfə insanı Yerin qütb orbitinə göndərərək tarixi bir uğura imza atıb
AzerVoice xəbər verir ki, bazar ertəsi
SpaceX Crew Dragon Resilience kapsulu ilə dörd astronavtı Yerin ən
uzaq nöqtələrinə aparan xüsusi Fram2 missiyasını həyata
keçirib.
Şirkət çərşənbə axşamı səhər saatlarında kapsulun qübbəli
pəncərəsindən Şimal və Cənub Qütblərinin ağ örtüklü mənzərələrinin
göründüyü ilk görüntüləri paylaşıb. SpaceX bu anı “Əjdahadan Yer
kürəsinin qütb bölgələrinin ilk şəkilləri” olaraq təqdim edib.
Missiyanın komandiri, kriptovalyuta milyarderi Chun Wang, norveçli kinematoqraf Jannicke Mikkelsen, avstraliyalı qütb tədqiqatçısı Erik Philips və alman robototexnika mütəxəssisi Rabea Rogge Falcon-9 raketi ilə ABŞ-ın Florida ştatındakı Kennedi Kosmik Mərkəzindən yerli vaxtla 21:44-də uğurla buraxılıb. Falcon-9-un təkrar istifadə oluna bilən birinci pillə gücləndiricisi isə Atlantik okeanındakı A Shortfall of Gravitas adlı pilotsuz platformaya eniş edib.
Üç-beş gün arası davam edəcək missiya çərçivəsində astronavtlar 422 kilometr hündürlüyə qalxaraq Yerin qütbləri üzərində dövrə vuracaq. Onların Şimal və Cənub Qütb zonalarını daha əvvəl Beynəlxalq Kosmik Stansiyadan (BKS) görünməyən detalları ilə müşahidə edəcəyi bildirilir. Bundan əlavə, komanda kosmosda insan sağlamlığını və fəaliyyətini təkmilləşdirməyə yönəlmiş 22 elmi təcrübə həyata keçirəcək.
Qeyd edək ki, bu missiya SpaceX-in insanlı kosmos uçuşları tarixində yeni bir mərhələ hesab olunur.
