BAKI, AzerVoice
Amerika alimləri düyü dənəsindən də kiçik olan və bədənə yeridilə bilən dünyanın ən kiçik kardiostimulyatorunu hazırlayıblar.
AzerVoice xəbər verir ki, müvəqqəti
ürək tənzimləyicisi kimi nəzərdə tutulan bu cihaz işıq siqnalları
ilə idarə olunur və müəyyən müddətdən sonra bədəndə əriyərək yox
olur.
Yeni kardiostimulyator xüsusilə anadangəlmə ürək xəstəlikləri olan
körpələr və əməliyyatdan sonra müvəqqəti stimulyatora ehtiyacı olan
xəstələr üçün effektiv həll kimi qiymətləndirilir. Yetkin
xəstələrdə isə ürək əməliyyatlarından sonra normal ritmin bərpasına
kömək edə bilər.
Cihazın ənənəvi kardiostimulyatorlardan əsas üstünlüyü simsiz və bədəndə həll olunan materiallardan hazırlanmasıdır. Mövcud müvəqqəti stimulyatorlarda batareyaların çıxarılması zamanı fəsadlar yarana bilər. Məsələn, 2012-ci ildə amerikalı astronavt Nil Armstronqun belə bir prosedurdan sonra daxili qanaxmadan öldüyü məlumdur.
Cəmi 1 millimetr qalınlığında və 3,5 millimetr uzunluğunda olan yeni kardiostimulyator xəstənin sinəsinə yapışdırılmış yumşaq yamaq ilə əlaqələndirilir. Yamaq ürək döyüntülərində nizamsızlıq aşkar etdikdə işıq siqnalları vasitəsilə stimulyatora lazımi ritmi tənzimləməyi bildirir.
ABŞ-ın Northwestern Universitetindən Prof. Dr. Mehmet Özcandır və Con Rocersin rəhbərlik etdiyi tədqiqat qrupu cihazın siçan, siçovul, donuz, it və insan ürək toxumalarında uğurlu nəticələr verdiyini açıqlayıb. Alimlər kardiostimulyatorun 2-3 il ərzində insanlarda sınaqdan keçirilə biləcəyini bildirirlər.
Qeyd edək ki, Ümumdünya Səhiyyə Təşkilatına (ÜST) görə, ürək xəstəlikləri dünyada ən çox ölümə səbəb olan xəstəliklər sırasındadır. Yeni kardiostimulyatorun tibbi texnologiyada inqilabi yenilik olacağı və gələcəkdə sinir bərpası, yaraların sağalması və ağıllı implantlar kimi sahələrdə də tətbiq edilə biləcəyi vurğulanır.
