Əsas səhifə » Hollivud ulduzu Val Kilmer 65 yaşında vəfat edib

Hollivud ulduzu Val Kilmer 65 yaşında vəfat edib

BAKI,AzerVoice

1980-90-cı illərin ən məşhur filmlərində, o cümlədən Top Gun və Batman Foreverdə rol alan Hollivud aktyoru Val Kilmer 65 yaşında dünyasını dəyişib.

AzerVoice xəbər verir ki, o, həmçinin 1991-ci ildə The Doors filmində əfsanəvi rok qrupunun solisti Cim Morrisonu canlandırıb, eləcə də Tombstone vesternində və Heat kriminal dramında rol alıb.

Kilmer çərşənbə axşamı Los-Ancelesdə sətəlcəmdən vəfat edib. Bu barədə qızı Mercedes ABŞ mediasına məlumat verib. Onun sözlərinə görə, aktyora 2014-cü ildə boğaz xərçəngi diaqnozu qoyulmuşdu, lakin sonradan sağalmışdı.

Traxeotomiya əməliyyatı onun səsini zəiflətmiş və aktyor karyerasına təsir etmişdi. Buna baxmayaraq, o, 2022-ci ildə Top Gun: Maverick filmində Tom Kruzla birgə döyüş pilotu Iceman rolunu yenidən canlandıraraq ekranlara qayıtmışdı.

Val Kilmer kim idi?

Val Edvard Kilmer 31 dekabr 1959-cu ildə anadan olub və Los-Ancelesdə orta təbəqədən olan bir ailədə böyüyüb. Onun valideynləri xristian elmi hərəkatının üzvləri idi və Kilmer də ömrü boyu bu inancı qoruyub saxladı.

O, 17 yaşında olarkən dünyanın ən nüfuzlu teatr məktəblərindən biri sayılan Nyu-Yorkdakı Culliard Məktəbinə daxil olan ən gənc tələbə oldu.

Kilmer 1984-cü ildə Top Secret! və 1985-ci ildə Real Genius komediyaları ilə məşhurlaşdı. Daha sonra 1986-cı ildə Top Gun filmində Tom Kruzun canlandırdığı Maverick-in rəqibi Iceman rolunu oynayaraq aktyorluq karyerasını möhkəmləndirdi.

Kilmer daha sonra Willow fantaziya filmi və Kill Me Again kriminal trillerində rol aldı. Bu filmlərdə onun tərəf müqabili 1988-ci ildə evləndiyi britaniyalı aktrisa Coann Uolli idi.

O, 1991-ci ildə The Doors filmində Cim Morrison rolunu mükəmməl şəkildə ifa edərək öz dinamik və çoxşaxəli istedadını sübut etdi. 20 il əvvəl vəfat edən Morrisonun obrazını canlandırması aktyora böyük uğur qazandırdı.

Kilmerin Tombstone filmində silahşor Dok Hollidey və Heat filmində Al Paçino və Robert De Niro ilə birlikdə rol alması da onun aktyorluq istedadının sübutu oldu.

1995-ci ildə o, Maykl Kitondan sonra Batman Forever filmində Betmenin pelerinini üzərinə götürdü. Film kassada uğur qazansa da, tənqidçilər tərəfindən qarışıq rəylər aldı. Kilmer isə növbəti Batman filmindən imtina etdi.

1997-ci ildə The Saint filmində maskalanma ustası və cinayətkar obrazında göründü. Bu film Leslie Charteris-in kitabları əsasında çəkilmişdi və 1960-cı illərdə Rocer Murdun baş rolda oynadığı serialdan ilham almışdı.

O, 1996-cı ildə The Island of Dr. Moreau filmində Marlon Brandonun canlandırdığı obrazın köməkçisi rolunu oynadı. Lakin film Hollivudun ən uğursuz layihələrindən biri kimi tarixə düşdü. Rejissor Con Frankenhaymer isə Kilmerlə bir daha işləməyəcəyini elan etdi. Aktyorun çəkiliş meydançasında çətin xarakterə sahib olduğu barədə şayiələr yayılmışdı.

2021-ci ildə Kilmer öz həyatı və karyerasının yüksəlişlərini və enişlərini əks etdirən sənədli film təqdim etdi. Val adlı bu film Kann Film Festivalında nümayiş olundu və orada 40 illik şəxsi video çəkilişlər də yer aldı. Həmçinin, boğaz xərçəngi əməliyyatından sonra səs cihazı ilə danışan görüntüləri də filmdə əks etdirilmişdi.

Kilmer aktyorluq karyerasını davam etdirdi, lakin onun Top Gun: Maverick filmində yenidən Iceman roluna qayıdışı xüsusilə duyğusal bir an oldu.

Digər Kateqoriyalar

2025 © Azervoice