BAKI, AzerVoice
ABŞ Ukrayna prezidenti Volodimir Zelenskini faydalı qazıntılarla bağlı razılaşmanı pozmaqda ittiham edib.
AzerVoice xəbər verir ki, bu haqda ABŞ-ın maliyyə naziri Skott Bessent jurnalist Taker Karlsona verdiyi müsahibədə bildirib.
"Razılaşma üçün hər şey hazır idi, amma nəticədə heç nə imzalanmadı", - deyə Bessent qeyd edib.
Qeyd edək ki, fevralın 28-də Zelenski ilə ABŞ prezidenti Donald Tramp arasında Ağ Evdə baş verən mübahisə nəticəsində mətbuat konfransı ləğv edilmişdi, ABŞ və Ukrayna arasında Faydalı qazıntılarla bağlı saziş isə imzalanmamışdı.
Martın 27-də isə Kiyev Vaşinqtondan sənədin yeni versiyasını aldığını açıqlayıb. Yeni versiyadakı şərtlər əvvəlkindən daha sərt olub. Sənədə görə Kiyev ABŞ-dan aldığı 120 milyard dollardan çox yardımı kompensasiya etməli, bərpa üçün yaradılacaq investisiya fondunun idarəsi ABŞ-ın nəzarətinə keçməlidir. Həmin fonda isə Kiyevin faydalı qazıntıların hasilatından əldə etdiyi rüsum və rüntə gəlirlərindən ödənişlər daxil olacaq.
Bundan sonra Ukrayna rəsmiləri bildirmişdilər ki, sazişlə bağlı mövqeləri üzərində işləyirlər. Zelenski isə Vaşinqtonun şərtləri dəyişdirməsindən şikayətlənib. Lakin Tramp bildirib ki, əgər Zelenski razılaşmadan geri çəkilməyə çalışsa, onu böyük problemlər gözləyir.
