BAKI,AzerVoice
Rusiyanın Ukraynanın mərkəzinı endirdiyi raket zərbəsi nəticəsində həlak olanların sayı 18-ə çatıb.
AzerVoice xəbər verir ki, cümə günü baş vermiş hücumda 61 nəfər yaralanıb. Yaralananlardan 40 nəfər xəstəxanaya yerləşdirilib. Onlardan 2-si uşaq olmaqla 19 nəfərin vəziyyəti ağır olaraq qiymətləndirilir. Yaralılar arasında 3 aylıq körpə də var.
Ukrayna Prezidenti Volodimir Zelenskinin sözlərinə görə, raket uşaq meydançasına və adi küçələrə düşüb. Hücum nəticəsində təxminən 20 yaşayış binası, 30-dan çox avtomobil, bir təhsil müəssisəsi və restoran zərər görüb.
Rusiya Müdafiə Nazirliyi zərbənin yüksək dəqiqlikli raketlə həyata keçirildiyini və hədəfin restoranda toplanmış Ukrayna bölmə komandirləri ilə Qərb təlimatçıları olduğunu iddia edib. Bildirilir ki, nəticədə 85 hərbçi və xarici zabit öldürülüb, 20 avtomobil məhv edilib. Lakin bu məlumatlar müstəqil şəkildə təsdiqlənməyib və Ukrayna Baş Qərargahı tərəfindən təkzib olunub.
Hadisədən bir müddət sonra şəhərə yönəlmiş dron hücumu nəticəsində bir qadın həyatını itirib, 7 nəfər yaralanıb.
Prezident Zelenski Rusiyanın bu hücumlarını müharibəyə son qoymaq istəmədiyinin göstəricisi adlandırıb.
"Hər raket və dron hücumu Rusiyanın müharibə istədiyini göstərir. ABŞ, Avropa və dünya ictimaiyyəti Rusiyanı bu terror siyasətindən çəkindirmək üçün kifayət qədər gücə sahibdir" — deyə o vurğulayıb.
