BAKI, AzerVoice
Hindistanda parlamentdə qəbul edilən yeni qanun layihəsi müsəlman fondlarının dövlət nəzarətinə verilməsini nəzərdə tutur, bu isə ölkədə sosial gərginliyi artırıb.
AzerVoice xəbər verir ki, anti-İslam
ritorikası ilə tanınan baş nazir Narendra Modinin rəhbərlik etdiyi
hindu milliyyətçisi Bharatiya Janata Partiyası, Müsəlman Vəqfləri
Aktına dəyişiklik edərək, fondların idarəsinə dövlətin müdaxiləsini
qanuniləşdirib.
Parlamentin aşağı palatası Lok Sabhada keçirilən səsvermədə qanun
layihəsi 288 lehinə, 232 əleyhinə səslə qəbul olunub.
Belə ki, qanunun qüvvəyə minməsi üçün o, Dövlətlər Şurasında da təsdiqlənməli və prezident Draupadi Murmu tərəfindən imzalanmalıdır. Yeni qanun layihəsi hökumətə dini, təhsil və xeyriyyə məqsədli müsəlman vəqflərinin torpaqlarını yoxlama və müdaxilə etmə səlahiyyəti verir.
Müxalifət qanunun konstitusiyaya zidd olduğunu və müsəlmanlara qarşı ayrı-seçkilik ehtiva etdiyini bildirir. Hindistan Milli Konqres Partiyasının lideri Rahul Qandi bu dəyişiklikləri “müsəlmanların mülkiyyət hüquqlarına yönəlmiş hücum” kimi dəyərləndirib.
Hazırda ölkədə 940 min hektardan çox torpağı əhatə edən 872 minə yaxın vəqf əmlakı mövcuddur. Modi administrasiyası bu əmlakların idarəsində şəffaflığın artırılmasını hədəflədiyini bildirsə də, vətəndaş cəmiyyəti və müsəlman təşkilatları bu addımı “mülkiyyət hüquqlarının pozulması” kimi dəyərləndirir.
Qanun layihəsinə qarşı ölkənin müxtəlif bölgələrində etiraz nümayişləri, oturaq aksiyalar və seminarlar keçirilir. Martın 26 və 29-da Patna və Vicayavada parlament binalarının qarşısında genişmiqyaslı aksiyalar baş tutub.
