Myanmada zəlzələdə ölənlər arasında Çinli vətəndaşlar da var

BAKI, AzerVoice

Myanmanın Saqainq bölgəsi yaxınlığında baş verən güclü zəlzələlər nəticəsində 5 Çin vətəndaşı həyatını itirib, 13 nəfər yaralanıb.

AzerVoice xəbər verir ki, Myanmanın mərkəzində martın 28-də 7,7 və 6,4 bal gücündə iki zəlzələ qeydə alınıb.

Çin səfirliyinin verdiyi məlumata görə, fəlakət nəticəsində ölənlərin ailələrinə və digər zərərçəkənlərə lazımi dəstək göstərilir.

Zəlzələ Myanma ilə yanaşı, qonşu Tailand və Çində də hiss edilib. Çinin Yunnan və Sıçuan əyalətlərində də yeraltı təkanlar qeydə alınıb, lakin insan tələfatı olmayıb. Sərhədə yaxın Ruili şəhərində bəzi evlərə ziyan dəyib.

Qeyd edək ki, Myanma bölgəsi seysmik aktiv zonada yerləşir və bu cür güclü zəlzələlər bölgə üçün qeyri-adi deyil.