BAKI, AzerVoice
10 ildir axtarılan Malaysia Airlines MH370 təyyarəsinin axtarışları yenidən dayandırılıb.
AzerVoice xəbər verir ki, Malayziyanın nəqliyyat naziri Entoni Loke mövsümi şəraitin uyğun olmadığını bildirərək, axtarışların ilin sonunda bərpa olunacağını açıqlayıb.
2014-cü il martın 8-də Kuala-Lumpurdan Pekinə gedən Boeing 777 tipli sərnişin təyyarəsi 227 sərnişin və 12 ekipaj üzvü ilə birlikdə müəmmalı şəkildə yoxa çıxıb. Malayziya rəsmiləri bildiriblər ki, təyyarə qəsdən marşrutdan yayındırılıb və yanacağı bitənə qədər uçaraq Hind okeanının cənubunda düşüb.
Son 10 il ərzində 26 ölkə bu müəmmalı hadisənin sirrini açmağa çalışsa da, qalıqların dəqiq yeri müəyyən edilməyib. 2018-ci ildə Malayziya hökuməti ABŞ-ın dəniz kəşfiyyat şirkəti Ocean Infinity ilə müqavilə bağlayıb. 70 milyon dollara qədər mükafat təklif edilən axtarışlar nəticəsiz qalıb.
Bu il fevralın 25-də Ocean Infinity yeni texnologiyalarla 5800 kvadrat kilometrlik ərazidə axtarışlara yenidən başlayıb. Lakin nəticə əldə olunmadığı üçün əməliyyat müvəqqəti dayandırılıb.
Malayziya hökuməti və təyyarənin sərnişinlərinin yaxınları hələ də MH370-in sirrinin açılacağına ümid edir. Təyyarənin qalıqlarının Afrikanın şərq sahillərində və Hind okeanındakı adalarda tapıldığı bildirilsə də, onun necə və niyə marşrutdan çıxdığı hələ də qaranlıqdır.
Hadisə müasir aviasiya tarixinin ən böyük sirlərindən biri olaraq qalır.
