BAKI, AzerVoice
Macarıstan Beynəlxalq Cinayət Məhkəməsinin (ICC) Roma Statutundan çıxacağını açıqlayıb.
AzerVoice xəbər verir ki, bu qərar
İsrailin baş naziri Binyamin Netanyahunun Budapeştə rəsmi
səfərindən sonra elan edilib.
Macarıstanın baş naziri Viktor Orbanın aparat rəhbəri Gergely
Gulyas çıxış edərək, "Hökumət konstitusiya və beynəlxalq hüquqi
çərçivəyə uyğun olaraq geri çəkilmə proseduruna başlayacaq" - deyə
bildirib.
ICC son illərdə, xüsusilə Rusiya prezidenti Vladimir Putin və İsrailin baş naziri Netanyahuya qarşı verdiyi həbs orderləri səbəbindən mübahisələrin mərkəzinə çevrilib. Macarıstan rəsmiləri məhkəmənin siyasi motivli qərarlar verdiyini iddia edirlər.
Gulyas bildirib ki, Macarıstan heç vaxt ICC-nin Roma Statutunu daxili qanunvericiliyinə daxil etməyib, bu səbəbdən də məhkəmənin qərarlarının ölkədə hüquqi qüvvəsi yoxdur. O, həmçinin dünyanın aparıcı dövlətlərinin, o cümlədən ABŞ-ın ICC-nin yurisdiksiyasını tanımadığını vurğulayıb.
Macarıstanın bu addımı Netanyahuya qarşı ICC-nin həbs orderi fonunda atması diqqət çəkir. Qeyd edək ki, noyabr ayında məhkəmə Netanyahu və keçmiş müdafiə naziri Yoav Gallantı Qəzzada humanitar yardımı məhdudlaşdıraraq “aclıqdan müharibə üsulu kimi” istifadə etməkdə və mülki insanları qəsdən hədəf almaqda ittiham edib. İsrail rəsmiləri bu iddiaları rədd edirlər.
Qeyd edək ki, ICC-nin Roma Statutundan çıxan ilk ölkə 2017-ci ildə Burundi olub. Daha sonra Filippin də məhkəməni tərk edib. Cənubi Afrika və Qambiya ICC-ni tərk etmək niyyətini açıqlasalar da, sonradan qərarlarını dəyişiblər. Türkiyə ICC-nin təsis müqaviləsini imzalamasa da, təşkilatın fəaliyyətini yaxından izləyir və İştirakçı Dövlətlər Assambleyasının iclaslarında iştirak edir. Bu qərarla Macarıstan ICC-dən rəsmi çıxacaq üçüncü ölkə olacaq.
