BAKI, AzerVoice
Myanmada baş verən 7,7 bal gücündə dağıdıcı zəlzələdən beş gün sonra yerli və Türkiyədən gələn xilasetmə qrupları bir nəfəri dağıntılar altından sağ çıxarıb.
AzerVoice xəbər verir ki, paytaxt
Neypidoda həyata keçirilən xilasetmə əməliyyatı 9 saatdan çox davam
edib.
Türkiyədən göndərilən xilasedicilər yerli qruplarla birlikdə Naing
Lin Tun adlı şəxsin yerini müəyyən edərək endoskopik kamera
vasitəsilə onun sağ olduğunu təsdiqləyiblər. Ardınca xilasedicilər
onun qaldığı otelin dağıntıları altında çuxur qazaraq onu
təhlükəsiz yerə çıxarıblar. Beləliklə, 26 yaşlı gənc zəlzələdən 108
saat sonra xilas edilib.
Myanmada baş verən zəlzələ nəticəsində ölənlərin sayı artmaqdadır. MRTV dövlət televiziyasının məlumatına görə, çərşənbə günü ölənlərin sayı 2886 nəfərə çatıb, 4639 nəfər yaralanıb. Zəlzələ qonşu Taylandda da tələfatla nəticələnib, burada ən azı 22 nəfərin öldüyü bildirilir.
Ölkədə davam edən vətəndaş müharibəsi səbəbindən yollar və körpülər ciddi ziyan görüb, bu da xilasetmə işlərinə mane olur. Junta rəhbəri Min Aunq Hlainq ölənlərin sayının 3000-dən çox artacağını proqnozlaşdırıb.
Humanitar yardım təşkilatları fəlakətdən zərərçəkənlərə kömək üçün Myanmar ordusu ilə müxtəlif etnik silahlı qruplar arasında atəşkəsə çağırıb. Bəzi üsyançı qruplar birtərəfli atəşkəs elan etsə də, hökumət qüvvələrinin zəlzələdən zərər çəkmiş ərazilərə hücumlarını davam etdirdiyi bildirilir.
BMT-nin Myanmada insan haqları üzrə xüsusi məruzəçisi Tom Endryus bu hərbi hücumların dərhal dayandırılmalı olduğunu bildirib: "Myanmada diqqət insanların həyatını almağa yox, onları xilas etməyə yönəlməlidir."
Cümə günü baş verən zəlzələ Myanmada onsuz da ağır olan humanitar böhranı daha da dərinləşdirib. BMT-nin məlumatına görə, hətta fəlakətdən əvvəl də ölkədə təxminən 20 milyon insan humanitar yardıma ehtiyac duyurdu.
