BAKI, AzerVoice
Novruz bayramı ilə əlaqədar şəhərlərarası yollarda hərəkətliliyin artdığı İranda son 18 gündə baş verən yol qəzalarında 747 nəfərin həyatını itirdiyi bildirilib.
AzerVoice xəbər verir ki, Tesnim Xəbər Agentliyinin məlumatına görə, İran Polisinin Nəqliyyat Şöbəsinin baş direktoru Timur Hüseyni Novruz bayramı zamanı ölkə ərazisində baş verən yol qəzaları barədə məlumat verib.
Hüseyni, "Son 18 gündə baş verən 14 min 178 yol qəzasında 747 nəfər həyatını itirdi, 16 min 905 nəfər isə yaralandı" - deyə qeyd edib.
Ən çox ölümlə nəticələnən qəzaların baş verdiyi yerlər barədə məlumat verən Hüseyni qeyd edib ki, yol qəzalarında Kirman vilayətində 66, Farsda 64, Xorasani Rezevidə 53, Xuzistanda 48, Sistan-Bəlucistan əyalətində 46 nəfər həlak olub.
İran rəsmisi bildirib ki, qəzaların çoxu ehtiyatsızlıq və ötmə əməliyyatlarının düzgün aparılmaması kimi səbəblərdən baş verib.
Qeyd edək ki, İranda Novruz bayramı ilə əlaqədar 4 günlük dövlət tətili var. Bununla belə, iranlılar Novruz bayramında ümumiyyətlə 2 həftəlik məzuniyyətə çıxırlar və bayram günlərini illik məzuniyyətləri ilə birləşdirirlər. Bayram günlərində şəhərlərarası yollarda qəzalarda artım müşahidə olunur.
