BAKI, AzerVoice
Husilər Qırmızı dənizdə ABŞ-a məxsus USS Harry Truman təyyarədaşıyan gəmisini və bölgədəki digər hərbi gəmiləri üçüncü dəfə raket və dronlarla hədəfə aldıqlarını açıqlayıb.
AzerVoice xəbər verir ki, Husi ordusunun sözçüsü Yəhya
Seri bu gün səhər verdiyi bəyanatda ABŞ donanmasının Qırmızı
dənizdə yerləşən döyüş gəmilərinə qarşı əməliyyat keçirdiklərini
bildirib.
Onun sözlərinə görə, hücum “Truman” təyyarədaşıyan gəmisinin
başçılıq etdiyi donanmaya yönəlib və son 24 saat ərzində bu cür
üçüncü qarşıdurma qeydə alınıb. “Biz ABŞ düşməninə qarşı
hücumlarımızı artıraraq davam etdiririk və bu, elan etdiyimiz
əməliyyat bölgəsində gedən mübarizənin bir hissəsidir” – deyə Seri
bildirib.
Husilərin sözçüsü vurğulayıb ki, onların hücumları Fələstin xalqına qarşı həyata keçirilən “soyqırımı” dayandırmaq məqsədi daşıyır və İsrailin Qəzzaya qarşı hücumları dayanmadıqca bu əməliyyatlar da davam edəcək.
Qeyd edək ki, husilər martın 11-də İsrail və HƏMAS arasında atəşkəs danışıqlarının uğursuzluqla nəticələnməsindən sonra Qırmızı dəniz və Ərəbistan dənizində İsrail gəmilərinə qarşı hücumları bərpa etdiklərini açıqlamışdılar. Onların sözlərinə görə, hədəfləri yalnız İsrail gəmiləri olsa da, bölgədəki ABŞ və digər Qərb hərbi qüvvələri də qarşıdurmanın bir hissəsinə çevrilib.
ABŞ tərəfi isə hələlik hücumlarla bağlı rəsmi açıqlama yaymayıb. Lakin daha əvvəl Pentaqon husilərin Qırmızı dənizdəki gəmi və ticarət yollarına hücumlarının beynəlxalq dəniz nəqliyyatı üçün təhlükə yaratdığını bildirmiş və müvafiq tədbirlər görüləcəyini bəyan etmişdi.
