BAKI, AzerVoice
Şimali Koreya Yaponiya hökumətindən 1945-ci ildə Tokio bombalaması zamanı həyatını itirən koreyalılar üçün üzr istəməsini və təzminat ödəməsini tələb edir.
AzerVoice xəbər verir ki, Şimali Koreya Mərkəzi Xəbər Agentliyinin (KCNA) məlumatına görə, Koreya yarımadasındakı müstəmləkə dövründə məcburi işlədilən koreyalı işçilər və onların ailələri tərəfindən qurulan Şimali Koreya Dərnəyi bu məsələyə dair bəyanat yayıb.
Açıqlamada bildirilir ki, ABŞ-ın 10 mart 1945-ci ildə 275 B-29 bombardman təyyarəsi ilə Tokioya endirdiyi hücum zamanı Yaponiyanın məcburi işlədilən koreyalıları təhlükəli şəraitdə qruplar halında saxladığı, nəticədə onların böyük hissəsinin həlak olduğu iddia olunur.
Məlumata görə, həmin hücumda ölənlərin təxminən 10%-ni koreyalılar təşkil edib və onların kimlikləri araşdırılmadan müxtəlif yerlərdə basdırılıb. Daha sonra bəzi qurbanların cəsədlərinin etik olmayan məqsədlərlə istifadə edildiyi iddia edilir.
Bəyanatda Yaponiya hökumətindən qurbanların yaxınlarından üzr istəməsi, təzminat ödəməsi və hadisənin tam araşdırılması tələb olunur. Həmçinin vurğulanır ki, koreyalı qurbanlar öləndən sonra da öz vətənlərinə qayıda bilməyiblər və bu faciənin səbəbi Yaponiyanın müstəmləkə siyasəti olub.
Qeyd edək ki, Şimali Koreya uzun illərdir ki, Yaponiyanı müstəmləkə dövründə koreyalılara qarşı törətdiyi əməllərə görə üzr istəməyə və məsuliyyəti qəbul etməyə çağırır.
