Bakı,
AzerVoice
ABŞ Milli Nəqliyyat Təhlükəsizliyi Şurasının (NTSB) məlumatına
görə, Cessna 172S və Lancair 360 MK II tipli iki kiçik təyyarə
Marana Regional Hava Limanı yaxınlığında havada toqquşub.
AzerVoice xəbər verir ki , qəzadan
sonra təyyarələrdən biri sağ-salamat eniş edə bilsə də, digəri yerə
çırpılaraq alovlanıb.
Marana Polis İdarəsi hadisə nəticəsində iki nəfərin öldüyünü təsdiqləyib. Təyyarələrdə ümumilikdə dörd nəfərin olduğu bildirilsə də, sağ qalanlar barədə ətraflı məlumat verilməyib. Hadisə yerində araşdırmalar aparıldığı üçün Marana Regional Hava Limanı müvəqqəti bağlanıb.
ABŞ Federal Aviasiya Administrasiyası (FAA) Marana hava limanında aktiv nəzarət qülləsinin olmadığını və pilotların uçuşlarını bir-birilə əlaqələndirdiyini qeyd edib. Belə hava limanlarında hava hərəkətinə nəzarətin olmaması riskləri artırır.
Son aylarda bir sıra təyyarə qəzaları hava təhlükəsizliyi ilə bağlı narahatlıqları artırıb. Yanvarın 29-da Ronald Reyqan Milli Hava Limanında hərbi helikopterlə sərnişin təyyarəsinin toqquşması, Alyaskada 10 nəfərin ölümü ilə nəticələnən qəza və Torontoda eniş zamanı çevrilən Delta Hava Yollarına məxsus təyyarə bu narahatlıqları gücləndirib.
