Bakı,
AzerVoice
Amerikalı milyarder və "Tesla" şirkətinin qurucusu İlon Mask
Almaniyanı nüvə enerjisindən istifadəni genişləndirməyə
çağırıb.
AzerVoice xəbər verir ki, İlon Mask bu
fikrini Almaniya üçün Alternativ Partiyasının (AfD) lideri Alis
Vaydel ilə "X" sosial platformasında keçirdiyi açıq müzakirə zamanı
bildirib.
"Mən Almaniyanın nüvə enerjisinin payını əhəmiyyətli dərəcədə
artırmasını düzgün hesab edirəm. Bu, ölkə üçün əla olardı", – Mask
deyib.
Mask Almaniyanın Rusiyadan gələn qazın kəsilməsinə cavab olaraq
nüvə elektrik stansiyalarını bağlamaq qərarını sərt şəkildə tənqid
edib.
"Almaniyanın Rusiya qazını kəsdikdən sonra atom elektrik
stansiyalarını bağladığını görəndə bunun tamamilə dəlilik olduğunu
düşündüm. Bu, indiyə qədər gördüyüm ən çılğın şeylərdən biridir", –
Mask bildirib.
Milyarder nüvə enerjisini ən təmiz və ən etibarlı enerji mənbələrindən biri kimi xarakterizə edib. Müzakirə zamanı AfD lideri Alis Vaydel də nüvə enerjisinə güclü dəstəyini ifadə edib və ölkəsinin enerji siyasətində səhvlərə yol verildiyini vurğulayıb.
Qeyd edək ki, Almaniyanın son üç nüvə reaktoru 2023-cü ilin aprelində həmişəlik istismardan çıxarılıb. Almaniya hökuməti enerji böhranı səbəbindən reaktorların fəaliyyət müddətini müvəqqəti uzatsa da, sonda nüvə enerjisindən tamamilə imtina etmək qərarına gəlib.
