BAKI, AzerVoice
Hər iki dəqiqədə bir qadın hamiləlik və doğuş zamanı həyatını itirir
AzerVoice xəbər verir ki, Ümumdünya
Səhiyyə Təşkilatının və digər BMT qurumlarının 2023-cü il üzrə
birgə hesabatına əsasən, hər iki dəqiqədə bir qadın hamiləlik və ya
doğuşla bağlı fəsadlardan dünyasını dəyişir.
Bu, il ərzində təxminən 260 min qadının həyatını itirməsi
deməkdir.
ÜST bildirir ki, 2000–2023-cü illər ərzində dünya üzrə ana ölümləri 40 faiz azalsa da, 2016-cı ildən etibarən bu irəliləyişin tempi xeyli zəifləyib. Hesabatda qeyd edilir ki, humanitar yardımın azalması və səhiyyə sistemlərinə edilən təzyiqlər bir çox ölkələrdə ana və uşaq sağlamlığına dair həyati əhəmiyyətli xidmətlərin zəifləməsinə səbəb olub.
Təşkilatın baş direktoru Tedros Adhanom Qebreyesus məsələ ilə bağlı, “Sadəcə tibbi xidmət deyil, qadın və qızların sağlamlıq və reproduktiv hüquqlarına çıxışı da təmin olunmalıdır. Bu hesabat bir tərəfdən ümid verir, digər tərəfdən isə bəzi bölgələrdə hamiləliyin nə qədər riskli olduğunu bir daha göstərir – halbuki əksər hallarda bu ölümlərin qarşısını almaq mümkündür” - deyə bildirib.
Qeyd edək ki, BMT-nin Davamlı İnkişaf Məqsədlərinə uyğun olaraq, 2030-cu ilə qədər hər 100 min doğuşa görə ana ölüm sayının 70-dən aşağı salınması hədəflənir. Hesabat bu məqsədə çatmağın “misli görünməmiş çağırış” olduğunu vurğulayır və təcili addımların vacibliyini qeyd edir.
