BAKI, AzerVoice
Müharibəyə başlamayacağıq, amma tam hazırıq və geri çəkilməyəcəyik.
AzerVoice xəbər verir ki, bu sözlər İranın İslam İnqilabı Keşikçiləri Korpusunun (SEPAH) baş komandanı Hüseyn Səlaminin verdiyi açıqlamada yer alıb.
“İran müharibəyə başlamayacaq, lakin düşməndən gələn hərbi təhdidlərə qarşı tam hazırdır”, - deyə o bildirib.
Səlami, həmçinin, bildirib ki, SEPAH düşmən qarşısında bir addım belə geri çəkilməyəcək və bütün hərbi və psixoloji ssenarilərə qarşı hazırdır”.
O, regiondaki son hadisələrə də diqqət çəkib.
“Bizim Qüds Qüvvələri eyni vaxtda Yəmən, İraq, Livan və Fələstin cəbhələrini idarə edərkən, ölkəmizdə seçkilər keçirilirdi. Bu zaman İsmayıl Haniyənin sionist rejim (İsrail red.) tərəfindən şəhid edilməsi, bizi böyük qisas alma qərarımıza bir daha sadiq etdi. Bu hadisələrin ardınca Livanda bəgər cihazlarının partlaması və Hizbullah liderlərinin şəhid olması, daha sonra isə mənəvi liderimiz Həsən Nəsrullahın və əziz qardaşımız general Abbas Nilfuruşanın şəhadəti ilə acı və kədərli günlər yaşadıq”, - deyə o vurğulayıb.
“Digər tərəfdə isə Husilər, Livandakı Hizbullah, İraq müqaviməti eyni keyfiyyətlə müqavimət göstərirlər. Belə geniş və şeytani bir cəbhə qarşısında nə partiyaya, nə Fələstinə, nə də bizə zərər dəyməməsi fikri, müharibə məntiqi ilə uyğun gəlmir. Düşmən gündüz və gecə bütün gücü ilə bizi fasiləsiz vurur – bu isə təbii bir haldır”, - deyə SEPAH-ın baş komandanı əlavə edib.
Səlami, İsraili məyus və gərgin bir düşmən adlandırıb.
“Biz silahsız bir xalqı məğlub edə bilməyən, məyus və gərgin bir düşmənlə qarşı-qarşıyayıq. Hər keçən gün məğlubiyyət və nifrət yazılır onların adına. Bu israillilər nə psixoloji, nə siyasi, nə də iqtisadi cəhətdən sabit deyillər. Əgər bir gün silah tədarükü dayansa, payız yarpaqları kimi töküləcəklər”, - deyə Səlami qeyd edib.
