BAKI, AzerVoice
İsrail ordusu işğal altındakı İordan çayının qərb sahilinin Ramallah şəhərində çoxlu sayda fələstinlini nəzarətə götürüb.
AzerVoice xəbər verir ki, Şahidlərdən alınan məlumata görə, çoxlu sayda İsrail əsgəri Ramallahın qərbindəki Beyt-Rima qəsəbəsinə basqın edərək, oradakı evlərin bir qismini “hərbi kazarma”ya çevirib.
Qəsəbədə “komendant saatı” tətbiq edən İsrail əsgərləri fələstinlilərin evlərinə basqın edib, çoxlu insanı həbs edib və açıq sahə araşdırmasına məruz qoyub.
Bölgə sakinləri İsrail əsgərlərinin gecə yarısından sonra İordan çayının qərb sahilinin müxtəlif bölgələrində, xüsusilə Ramallahın Tira qəsəbəsində silsilə basqınlar təşkil etdiyini və çoxlu sayda fələstinlini həbs etdiyini bildiriblər.
Qeyd edək ki, İsrailin Qəzza zolağına hücuma başladığı 7 oktyabr 2023-cü ildən bəri işğal altındakı İordan çayının qərb sahili və Şərqi Qüdsdə fələstinlilərə qarşı həbslər, basqınlar və hücumlarda artım müşahidə olunur.
Bu dövrdə işğal altındakı İordan çayının qərb sahili və Şərqi Qüdsdə Fələstin torpaqlarını qəsb edən İsrail əsgərləri və israillilərin hücumlarında 167-si uşaq olmaqla 928 fələstinli həyatını itirib, 7 minə yaxın adam yaralanıb, 14 min 500 nəfər isə nəzarətə götürülüb.
