Bakı,
AzerVoice
Fələstinliləri öz torpaqlarında saxlayaraq Qəzza zolağının yenidən
qurulmasını nəzərdə tutan Ərəb-Misir-Fələstin planı mövcuddur.
AzerVoice xəbər verir ki, İordaniya
xarici işlər naziri Ayman Safadi bildirib ki, Qəzzaya humanitar
yardımların davamlı olaraq çatdırılması və atəşkəsin qorunması üçün
ərəb dövlətləri birlikdə hərəkət etməlidir.
O vurğulayıb ki, İordaniya Kralı II Abdullah ABŞ-ın keçmiş
prezidenti Donald Trampa fələstinlilərin köçürülməsinə qarşı
alternativ və daha ədalətli bir plan təklif edib.
Safadi əlavə edib ki, Kral Abdullah bölgədə sabitliyin təmin olunması üçün yeganə yolun müstəqil Fələstin dövlətinin yaradılması olduğunu bəyan edib. “Biz Trampa açıq şəkildə bildirdik ki, ‘Fələstin fələstinlilərə, İordaniya isə İordaniyalılara məxsusdur’ və fələstinliləri köçürmədən sülhə nail olmaq lazımdır”, – deyə o bildirib.
Eyni zamanda, Safadi ərəb ölkələrinin koordinasiyalı şəkildə Trampın planına qarşı dayana biləcəyini və Qəzzada yaşayan fələstinlilər üçün daha məqbul bir həll yolu təklif edə biləcəyini bildirib. “Biz inanırıq ki, Qəzzanı fələstinliləri yerindən tərpətmədən yenidən qurmaq mümkündür”, – deyə nazir əlavə edib.
İordaniya Kralı II Abdullah da ABŞ prezidenti ilə görüşündən sonra verdiyi açıqlamada, “İordaniyanın Qəzza və İordan çayının qərb sahilində fələstinlilərin köçürülməsinə qarşı qəti mövqeyini bir daha təkrarladım”, – ifadəsini işlədib.
Qeyd edək ki, Donald Tramp Qəzzanın ABŞ-ın nəzarəti altına keçə biləcəyini bildirmiş, lakin ərəb dövlətləri, xüsusilə Misir və Səudiyyə Ərəbistanı bu məsələdə vahid mövqe nümayiş etdirərək danışıqların nəticələrinin gözlənilməli olduğunu vurğulamışdır.
