BAKI, AzerVoice
Qidalanma tərzi ağciyər xərçəngi riskini artıra bilər
AzerVoicexəbər verir ki, ABŞ-ın Florida və Kentukki universitetlərinin alimləri tərəfindən aparılan yeni araşdırma, ağciyər xərçəngi riskinin yalnız siqaret və hava çirkliliyi ilə deyil, həm də gündəlik qidalanma vərdişləri ilə əlaqəli ola biləcəyini ortaya çıxarıb.
Tədqiqatda orqanizmdə qlükozanı saxlayan molekul – qlikogenin, xüsusilə ağciyər adenokarsinoması adlanan və dünya üzrə ağciyər xərçəngi hallarının təxminən 40 faizini təşkil edən növün inkişafında rol oynaya biləcəyi müəyyən edilib. Siçanlar üzərində aparılan təcrübələr zamanı qlikogen səviyyəsinin artması şişin böyüməsini sürətləndirib, bu molekulun qarşısı alındıqda isə xərçəngin inkişafı zəifləyib.
Araşdırmada istifadə olunan qabaqcıl “məkan metabolomikası” texnikası sayəsində alimlər toxuma daxilində molekulların yerini xəritələşdirərək xəstəliyin molekulyar səviyyədə necə yayıldığını daha dəqiq müşahidə edə biliblər.
Əlavə olaraq, yüksək yağ və karbohidratla zəngin Qərb tərzi pəhrizlə qidalanan siçanlarda şişlərin daha sürətlə inkişaf etdiyi məlum olub. Bu da şəkərli və kalorili qidaların bəzi xərçəng növlərinin inkişafına “yanacaq” ola biləcəyini göstərir.
Qeyd edək ki, mütəxəssislər bu nəticələrin insan sağlamlığına təsirlərini də araşdırmaq üçün genişmiqyaslı insan tədqiqatlarının aparılmasına ehtiyac olduğunu vurğulayır. Lakin ilkin nəticələr pəhrizin xərçəngin qarşısının alınmasında əsas amil ola biləcəyini göstərir. Tədqiqat Nature Metabolism jurnalında dərc olunub.
