BAKI, AzerVoice
Qəzza zolağında təxminən 39 min uşaq valideynlərindən birini və ya hər ikisini 534 gün davam edən müharibə nəticəsində itirib.
AzerVoice xəbər verir ki, bu haqda Fələstin Mərkəzi Statistika İdarəsinin yaydığı məlumatda deyilir.
Məlumata əsasən, bu uşaqlardan “təxminən 17 min uşaq hər iki valideynini itirib”.
Bəyanatda deyilir: “Bu uşaqlar faciəvi şəraitdə yaşayırlar. Onların bir çoxu cırıq çadırlarda və ya dağıdılmış evlərdə sığınmağa məcbur olub. Sosial qayğı və psixoloji dəstəyin demək olar ki, tamamilə yoxluğu vəziyyəti daha da ağırlaşdırır”.
İsrail, 7 oktyabr 2023-cü ildə HƏMAS hərəkatının Qəzza zolağına bitişik şəhər və ordu düşərgələrinə qəfil hücumuna cavab olaraq Qəzzaya qurudan və havadan genişmiqyaslı hücum həyata keçirib. Bu hücum nəticəsində 1200 nəfər ölüb və təxminən 250 nəfər girov götürülüb.
Fələstin Mərkəzi Statistika İdarəsinin bəyanatında bildirilir ki, İsrail hücumu nəticəsində həyatını itirənlərin “ümumi sayının 60 faizindən çoxu qadınlar və uşaqlardır”.
Bəyanatda deyilir: “Təcavüz nəticəsində ümumilikdə 50 min 21 fələstinli şəhid olub. Onlardan 17 min 954 nəfəri uşaqdır. Bu uşaqlardan 274-ü bombardman altında doğulub və dünyasını dəyişib, 876-sı bir yaşına çatmamış həyatını itirib, 17 uşaq köçkün düşərgələrində soyuqdan ölüb, 52 uşaq isə Qəzza zolağında planlı aclıq və qida çatışmazlığı səbəbindən həyatını itirib”.
Bəyanata görə, “İşğal altındakı İordan çayının qərb sahilində isə 923 fələstinli şəhid olub, onların 188-i uşaqdır və bu müddət ərzində 660 uşaq yaralanıb”.
Fələstin Mərkəzi Statistika İdarəsi Qəzza zolağında iki tədris ili ərzində təhsilin tamamilə dayanmasına da diqqət çəkib.
Bildirilib ki, “Fələstin Təhsil Nazirliyi sinxron və qeyri-sinxron onlayn təhsil, müvəqqəti məktəblər kimi alternativ təhsil yollarını tətbiq etsə də, Təhsil və Ali Təhsil Nazirliyinin məlumatlarına görə, hazırda Qəzza zolağında 298 mindən çox şagird virtual məktəblərdə təhsilə cəlb olunub”.
Qurum əlavə edib ki, “bu şagirdlərin əksəriyyəti uzun müddət ərzində effektiv təhsil ala bilməyib. Çünki təhlükəsiz zonaların olmaması, elektrik və internetin tez-tez kəsilməsi və təhsil üçün lazım olan cihazların çatışmazlığı səbəbilə bu vəziyyət bütöv bir nəsilin gələcəyini təhdid edən təhsil boşluğu yaradır”.
