BAKI, AzerVoice
Qəzzada 10 gün ərzində 322 uşaq həlak olub, 609 uşaq isə yaralanıb.
AzerVoice xəbər verir ki, UNICEF-in yaydığı açıqlamaya görə, humanitar yardımın tamamilə dayandırılması və ağır hava hücumları bölgədəki uşaqları kritik təhlükə ilə üz-üzə qoyub. Beynəlxalq təşkilatlar Qəzzada uşaq ölümlərinin sürətlə artacağı barədə xəbərdarlıq ediblər.
UNICEF-in icraçı direktoru Ketrin Rassel, 1 milyondan çox uşağın məcburi köçkün vəziyyətində qaldığını və əsas ehtiyaclardan məhrum olduğunu bildirib. O, bütün tərəfləri beynəlxalq humanitar hüquq çərçivəsində öhdəliklərini yerinə yetirməyə çağırıb.
Qeyd edək ki, son 19 ay ərzində Qəzzada 15 mindən çox uşaq həyatını itirib, 34 mindən çox uşaq isə yaralanıb. Humanitar təşkilatlar yaralı uşaqların təxliyəsi və təcili tibbi yardımla təmin edilməsi üçün beynəlxalq ictimaiyyəti təcili tədbirlər görməyə çağırır.
