BAKI,AzerVoice
İsrailin BMT-dəki səfiri Dani Danon, BMT-nin Fələstinli Qaçqınlara Yardım və İş Təşkilatının (UNRWA) Qüdsdəki fəaliyyətlərini dayandırması və istifadə etdiyi bütün binaları 30 yanvar cümə axşamına qədər boşaltması üçün vaxt təyin etdi. AzerVoice xəbər verir ki, bu barədə o, BMT-nin baş katibinə göndərdiyi məktubda qeyd edib.
Bu məktub, İsrail parlamentinin oktyabr ayında BMT təşkilatının İsraildə, o cümlədən 1967-ci ildən bəri işğal altında olan Şərqi Qüdsdə fəaliyyətini qadağan edən qanunu təsdiq etməsindən sonra göndərilib.
Danon bildirib ki, "İsrail qanunlarına uyğun olaraq, UNRWA Qüdsdəki fəaliyyətlərini dayandırmalı və şəhərdə istifadə etdiyi bütün binaları ən gec 30 yanvara qədər boşaltmalıdır".
İsrail, UNRWA-nı Fələstin HƏMAS hərəkatı tərəfindən təsir altında olmaqda ittiham edir və bəzi təşkilat işçilərinin 7 oktyabr 2023-cü il hücumlarında iştirak etdiyini iddia edir.
Danon məktubunda qeyd edib ki, bu " HƏMAS-ın UNRWA-ya nüfuz etməsi nəticəsində yaranan ciddi təhlükəsizlik risklərinə birbaşa cavabdır və təşkilatın İsrailin ciddi və obyektiv narahatlıqlarını həll etməməsi ilə əlaqədardır".
O əlavə edib ki, UNRWA "əsas dürüstlük və tərəfsizlik öhdəliyini bərpa edilməyəcək şəkildə pozmuşdur".
