Bakı, AzerVoice
Fələstinli ailələr, on minlərlə insanın ölümünə və humanitar
böhrana səbəb olan Qəzza müharibəsi zamanı Vaşinqtonun İsrail
ordusuna verdiyi dəstək səbəbi ilə ABŞ Dövlət Departamentini
məhkəməyə verib.
AzerVoice xəbər verir ki,bu barədə Kolumbiya Dairə Məhkəməsinə təqdim edilən iddiada bildirilib.
İddiaya görə, Entoni Blinkenin rəhbərlik etdiyi Dövlət Departamenti Qəzzada və işğal olunmuş İordan çayının qərb sahilində vəhşiliklər törətməkdə ittiham olunan İsrail hərbi birləşmələrini maliyyələşdirmək və dəstəkləmək üçün ABŞ İnsan Haqları Qanununu bilərəkdən pozub.
Leahy
Aktı, ciddi insan hüquqları pozuntularına yol vermiş və məhkəmə
qarşısına çıxarılmamış şəxslərə və ya təhlükəsizlik qüvvələrinin
bölmələrinə ABŞ-ın hərbi yardımını qadağan edir.
Beynəlxalq Ədalət Məhkəməsində Cənubi Afrika və Amnesty
International İsraili soyqırım və müharibə cinayətlərində ittiham
edib, İsrail isə bu ittihamları rədd edib. Vaşinqton isə İsrailə
olan davamlı dəstəyinə görə insan haqları qrupları tərəfindən
kəskin tənqid edilir.
ABŞ
Dövlət Departamenti isə məsələ ilə bağlı şərh verməkdən imtina edib
və jurnalistləri Ədliyyə Departamentinə yönləndirib, lakin hələlik
bu məsələ barədə rəsmi açıqlama verilməyib.
Qeyd edək ki, Qəzza zolağının Səhiyyə Nazirliyi tərəfindən verilən
məlumata görə, Qəzzada aparılan müharibə indiyə kimi 45 mindən çox
insanın həyatına son qoyub və 2,3 milyon Qəzzalının didərgin
düşməsinə səbəb olub.
