BAKI,AzerVoice
Hazırda Azərbaycan Tikinti Materialları İstehsalçıları Assosiasiyası (ATMİA) Avropaya tikinti materiallarının ixracı prosesi üzərində işləyir.
AzerVoice xəbər verir ki, bunu 10 aprel - İnşaatçılar Gününə həsr olunmuş “ATMİA İnşaatçılar Həftəsi“ ilə bağlı mətbuat konfransında Azərbaycan Tikinti Materialları İstehsalçıları Assosiasiyasının (ATMİA) baş katibi Şahanə Sarı deyib.
"Balkan yarımadası vasitəsilə istehsalçıların Avropaya ixrac etməsi üzərində işləyirik. Hazırda bu işlər davam etdirilir. İlkin olaraq, Avropaya ixrac olunan inşaat materiallarının standartlarını öyrənmə mərhələsindəyik.
Bizim oraya məhsul ixrac etməmiz üçün materiallarımızın hansı standartlara cavab verdiyini bilməliyik. İlkin qiymət araşdırmasına görə, Avropa bazarı bizim üçün sərfəli ola bilər, amma məsafənin uzaq olması, bir neçə ölkədən keçdiyinə görə, həmin ölkələrin gömrük xərcləri, daşınma xərcləri və digər xərclər araşdırılır.
Avropa bazarı bizim prioritet ixrac bazarlarımızdan biridir. Bu istiqamətdə əsaslı işlər görülür, - deyə Şahanə Sarı əlavə edib.
