BAKI,AzerVoice
Oruc İslamın beş əsas şərtindən biri olub, Ramazan ayında müsəlmanlara vacib buyurulmuş ibadətdir. Oruc tutmaq sübh azanından gün batana qədər yeməkdən, içməkdən və müəyyən fiziki fəaliyyətlərdən çəkinmək deməkdir. Bununla yanaşı, oruc yalnız fiziki aclıq və susuzluq deyil, eyni zamanda, insanın mənəvi təmizlənməsi, səbirli olması və nəfsini tərbiyə etməsi üçün bir vasitədir.
Orucun əsas məqsədlərindən biri insanın Allahın razılığını qazanması, təqva sahibi olması və maddi-mənəvi baxımdan özünü təmizləməsidir. Qurani-Kərimdə oruc haqqında belə buyurulur: "Ey iman gətirənlər! Sizdən əvvəlkilərə oruc vacib edildiyi kimi, sizə də vacib edildi ki, bəlkə, təqvalı olasınız." (Bəqərə, 183).
Orucun bir çox hikmətləri var. O, insanın səbrini artırır, nəfsini tərbiyə edir və aclığı hiss etməklə kasıbların halını anlamağa kömək edir. Bununla yanaşı, oruc insan orqanizmi üçün də faydalıdır; həzm sisteminə istirahət verir, bədəni zərərli toksinlərdən təmizləyir və immun sistemini gücləndirir.
İslamda orucun Ramazan ayında tutulması vacib olsa da, ilin digər aylarında da nafilə oruclar tövsiyə edilir. Məsələn, Şəvval ayının altı günü, Aşura günü və hər ayın ayın 13, 14, 15-ci günləri oruc tutmaq sünnədir.
Oruc, insanın ruhən və cismən saflaşmasına və daha mərhəmətli, səbirli olmasına vəsilə olan bir ibadətdir. Bu ibadət vasitəsilə müsəlmanlar həm Allahla olan bağlarını gücləndirir, həm də cəmiyyətə qarşı daha həssas və anlayışlı olurlar.
İftar oruc tutan şəxsin gün batdıqdan sonra yemək və içməklə orucunu açmasıdır. İslamda iftarın xurma və su ilə açılması tövsiyə olunur, çünki bu həm dini, həm də sağlamlıq baxımından faydalıdır.
Salman ibn Amirdən rəvayət edildiyinə görə, Rəsulullah belə buyurdu:
"Biriniz iftar edəcəyi zaman xurma ilə iftar etsin. Əgər xurma tapmazsa, su ilə iftar etsin. Çünki su təmizləyicidir."
Bu hədisi Əhməd, Tirmizi, Əbu Davud, Darimi və Hakim də rəvayət etmişlər.
Hədisdəki əmr vaciblik üçün deyil, məndub (tövsiyə edilən) bir əməldir.
Əl-Mənhəl əsərinin müəllifinə görə, xurma ilə iftar açmağın hikməti belə izah edilir:
-
Xurma şirindir. Oruc tutduqda zəifləyən gözlər şirniyyatla qüvvət qazanır.
-
Oruc ibadətlərin ən əzəmətlilərindəndir və ibadət pislikləri aradan qaldırır.
İbn Həcər əl-Məkkiyə görə, xurmanın bəzi faydaları bunlardır:
-
Xurma mədəyə çatdıqda, əgər mədə boşdursa, qida funksiyasını yerinə yetirir.
-
Mədədə artıq qida varsa, onu bağırsaqlara ötürməyə kömək edir.
-
Həkimlər çox xurma yeməyin göz zəifliyinə səbəb ola biləcəyini bildiriblər, lakin bu, həddindən artıq istifadəyə aiddir.
-
Xurma olmadıqda su ilə iftar etmək tövsiyə edilir, çünki su çox təmizləyici xüsusiyyətə malikdir.
-
Su susuzluğu aradan qaldırır və insanın həm maddi, həm də mənəvi baxımdan təmizlənməsinə vəsilə olur.
