Bakı, AzerVoice
Çələbi Mehmed Oğlunun taxta çıxmasını təmin etmək üçün dövlət adamları ilə çox yaxşı rəftar edirdi. Çələbi Mehmedin 4 oğlu var idi. Böyük oğlu Murad Amasiyada, kiçik oğlu Mustafa Çələbi isə İspartada sancaqbəyi idi. Digər iki oğlu Yusif və Mahmud isə ataları vəfat edəndə yaşları az idi.
Çələbi Mehmedin vəsiyyəti böyük oğlu Muradın öz yerinə keçməsi, Mustafa Çələbinin Anadolunu idarə etməsi və iki azyaşlı oğlunun isə sağ qalması üçün Bizansa göndərilməsi idi. Bunun qarşılığında Bizans Çələbi Mehmedin qardaşı Mustafa Çələbini azad etməyəcək və şahzadələrin xərcləri üçün müəyyən məbləğdə pul ödəniləcəkdi.
Çələbi Mehmed 1421-ci ilin iyununda 35 yaşında Ədirnədə vəfat etdi. Sultanın ölümünün elan edilməsi təhlükəli vəziyyətə gətirib çıxara bilərdi. Bizansın nəzarəti altında olan Şahzadə Mustafanın vəziyyəti eşidib hərəkətə keçəcəyindən qorxurdular. Buna görə də Çələbi Mehmedin ölümü dövlət adamlarının göstərişi ilə 42 gün gizlədildi. Sultanın daxili orqanları çıxarılıb, bədəninə dərman vuruldu. Vəziyyətə şübhə ilə yanaşan əsgərləri inandırmaq üçün isə ölmüş sultana paltar geyindirilərək işıqsız bir yerdə əsgərlərə göstərildi. Əsgərlərin komandirləri içəri girmək istədikdə isə həkim sultanın narahat olduğunu söyləyərək onları geri qaytara bilmişdi.
Şahzadə Muradın Bursaya gəldiyini eşidən dövlət adamları Anadoluya səfər olduğunu və sultanın xəstəliyi səbəbilə əvvəlcədən yola düşdüyünü bildirdilər. Sonra isə Bursaya gələrək Çələbi Mehmedi Yaşıl türbədə dəfn elədilər.
II Murad 1421-ci il iyulun sonunda 18 yaşında Bursada taxta çıxdı. Dövlət əmirləri II Muradın əmisi Mustafa Çələbiyə görə paytaxt Ədirnəyə gedib taxt-tac mərasimi keçirmədilər.
Bizans elçiləri II Muradı taxta çıxması münasibətilə təbrik etdilər və atasının vəsiyyətinə uyğun olaraq kiçik qardaşlarının onlara verilməsini istədilər. Lakin onların bu istəyini vəzir Bəyazid paşa “Müsəlman uşaqların qeyri-müsəlmanların qarşısında tərbiyəsi şəriətə ziddir” deyərək geri çevirdi. Gözlərinə mil çəkilərək kor edilən bu iki şahzadə 1429-cu ildə Bursada baş verən vəba epidemiyasında həyatını itirdi.