BAKI, AzerVoice

Avropa İttifaqı (Aİ), Apple və Meta şirkətlərini antiinhisar qanunvericiliyini pozduqlarına görə hələlik cərimələməmək qərarına gəlib.

AzerVoice xəbər verir ki, bu barədə The Wall Street Journal (WSJ) məlumat yayıb.

Məlumata görə, Avropa Komissiyası əvvəlcə aprelin 15-də cərimələr haqqında rəsmi qərar verməyi planlaşdırırdı. Lakin aprelin 14-də Avropa Komissiyasının ticarət siyasəti və iqtisadi təhlükəsizlik üzrə komissarı Maroş Şefçoviç ilə ABŞ administrasiyası nümayəndələri arasında keçirilən görüşdən sonra, Avropa İttifaqı cərimələrin tətbiqini ertələməyə qərar verib. Bu addımın səbəbi, Aİ ilə ABŞ arasında davam edən ticarət danışıqlarını riskə atmamaqdır.

Eyni zamanda, Avropa Komissiyası cərimələrin ləğvini planlaşdırmır, sadəcə müddət qeyri-müəyyən olaraq uzadılıb.

Xatırladaq ki, bundan əvvəl ABŞ Prezidenti Donald Tramp bəyan etmişdi ki, Birləşmiş Ştatlar Aİ ölkələri ilə 90 günlük möhlət müddəti bitməmiş yeni ticarət sazişi bağlaya bilər. Tramp aprelin 2-də 185 ölkə və əraziyə qarşı 10% ümumi idxal rüsumları tətbiq edəcəyini açıqlamışdı. Bu rüsumlar aprelin 5-də qüvvəyə minib. aprelin 9-da isə Tramp, 75 ölkəyə qarşı rüsumların artırılmasını 90 gün müddətinə dayandırdığını bildirmişdi, onların hamısına hələlik 10%-lik tarif tətbiq olunur.